ياشاسين بوتون آذربايجان سياسي محبوسلاری
بيرگون واريدي . بير گون يوخ ايدي
ائلمان ! گولومسه.......
ائلمان گؤزلريني باغلا لوطفن ، بير نئچه دقيقه ايچين.......
قاپالي گؤزلرينيله منيم قاپالي گؤزلريمه بير باخ , لوطفن.........
خاطيرلا ، اينجه و اوجا خيال لاريميزدا ، قول قولا دؤيؤن كئچمه ميش هانكي ايرماق لاردان ، اؤره ك اؤره يه داياق , كؤكسؤنو دلمه ميش هانكي داغلاردان و گؤز گؤزه ياشلي ايلقارلا اومود وئره رك، سمادان هانكي ياغمورو و هانكي دولونوياغديرماميش قالارديق ائلمان ؟!...........
ائلمان خاطيرلا بير .......
اوشاق كن سينيق پنجره لريميزدن چاخديرديغيميز بوش توفنگلري.....
ودومانلاردا ايتيردييميز ياشيل اوچورتماميزي.......
ائلمان خاطيرلا بير.....
ابدي ساييلان قارانليقلاري ، سويوق و سولموش ائويميزده ، او آنالارين گؤز ياشييلا ياشلانميش اودونلارلا ، نئجه ايسينديريب ، نئجه ايشيق لانديرارديق........
سن سايكي نئچه مين ايللرين يوخوسوندان اويانميش گؤنش....
يانميش كيتابلاريميزدان جانلي جومله لر تاپديغيميزي بير خاطيرلا ائلمان.... آ....آنا..... آنايورد....آذربايجان..... اؤره يميز چيرپينيردي ، و بير كه په نك , ماوي بير گؤل اؤستونده اوتوروردو گؤزلريميزين ايچينده ، سانكي هئچ اوچمايان كيمي.....
و او صفحه لر آراسيندا اكديميز قار چيچكلريني....... و بيرده آغ پامبيقلا بزه ديميز شه هريميز و قيزيل آلمالار و بايرام شه نليگي .....
دوداغين قاچير ائلمان ؟!! گؤلؤمسه به ييم !! سانكي بير مارال بالاسينين ايلك آياق آچيب , يئردن قوپوب قاچديغي سئوينج ديرميش ........
خاطيرلا ....
قوجا آغاج كؤلگه سينده ايله نرديك ، سن سازيني چاغلاردين ، ياپراقلار پيچيلداشارديلار و سودان گه لن سورمه لي قيز ....
ائلمان خاطيرلا... گئجه لر ساوالانا ديرمانيب ، گؤي دن آي-اولدوزوموزو چالارديق و كؤينه يميزه سانجاقلارديق .... بؤتؤن گئجه ني يوردوموزدا گزه رديك و گونه باخانلارلا سئويشرديك....
سحر چاغي گؤنش دوغمادان قوپاريب يئرلرينه تاخارديق ......
دوداغين قاچير ائلمان !! منيمده گؤزوم قاچدي كيلپيگيمين آلتيندان ، گؤلؤشونو گؤردوم ....
ائلمان ! قوي قار آلتيندا سينيخميش گؤللر سنه گؤونيب و اويانسين ، گؤلومسه به ييم !
قارتال اؤره ييني اوچورت قوي داغلار چالخالانسين .... گؤلؤشونو اسيرگه مه , بي ! سازاغي اووجوندا گوورچين ائده جكسن ، بونا امينم ....
ائلمان ! گؤزلريني آچ لوطفن ، بير عؤمور ايچين .....
قيزما منه ، آغلاماميشام.... سئوينج دندير ، بو بير داملا گؤز ياشيم سنه ايتحاف دير ! بير عؤمور ايچين ......
گولومسه ائلمان ، گولومسه ............
هیچ نظری موجود نیست:
ارسال یک نظر